Vitiligo — terida rang beruvchi hujayralar (melanotsitlar) ishlashdan to'xtashi natijasida oq dog'lar paydo bo'ladigan kasallik. U yuqumli emas va hayot uchun xavfli emas, lekin dog'lar tarqalishi mumkin — bemorlarimizning aksariyati aynan shu tarqalishni to'xtatish uchun keladi.
Nega paydo bo'ladi
Asosiy sabab — immun tizim melanotsitlarga xato hujum qilishi. Xavfni oshiradigan omillar: irsiy moyillik, qalqonsimon bez kasalliklari, kuchli stress, teri jarohati yoki kuyishi. Shuning uchun biz faqat terini emas, butun organizmni tekshiramiz.
Belgilari
- aniq chegarali sutdek oq dog'lar
- ko'pincha yuz, qo'l, oyoq, tirsak, tizza, jinsiy a'zolar atrofida
- dog'dagi sochlar oqarishi mumkin
- dog' qichimaydi va po'st tashlamaydi — bu zamburug'dan farqi
Vitiligoni nima bilan adashtirishadi
Zamburug' (lishay), quruqlikdan bo'ladigan oqarish, ba'zan «gijja» deb noto'g'ri davolanadi. Farqni dermatolog Wood lampasi bilan aniqlaydi.
Qanday davolanadi
- Eksimer lazer (308 nm) — dog'ga yo'naltirilgan ultrabinafsha nur, rang hujayralarini qayta ishlashga undaydi.
- Shifokor belgilagan dori va muolajalar.
- Sababga qarab endokrinolog va nevrolog davosi.
Yuzdagi dog'lar odatda tezroq javob beradi, qo'l-oyoq uchlaridagilar sekinroq. Natija har bemorda turlicha, aniq prognozni shifokor ko'rikdan keyin aytadi.